Aki bou bo por lesa tokante e eksperensianan di otro klientenan.
PD (Hulanda)
Pa mas o menos 2 aña largu mi tabata tin basta molèster di problemanan di barika/tripa kausá dor di strès. Den tal grado ku nan tabata dominá mi bida.
Ma purba tur sorto di kos: sosegá mi kurpa, huza probiótika, huza extra fibra i asta bishitá hòspital diferente biaha. Niun di e kosnan aki tabata juda. Según dòkter mi tabata tin PDS i mi mester a konformá mi mes ku e diagnóstiko aki.
Despues di un tempu mi a bin mira un dokumentario/programa na televishón tokante hipnoterapia. Ma komprondé ku e forma di terapia aki tambe ta juda ku PDS i problemanan ku barika. E no tabata un paso fasil pa tuma, pasó mi no tabata kere den e terapia. Pero finalmente ma akseptá pa purba e método aki. Siguientemente ma bai buska den besindario i ma bin enkontrá ku Marlene (In Trance).
Mi tabata tin un tiki bèrguensa di konta mi historia, pero ela demostrá komprondementu i konbibensia. I mesora e tabata tin un lugar pami. Despues di e prome seshón ja kaba ma kuminsá sinti menos keho.
Dor ku pa 2 aña kaba ku mi tabata tin molèster, ela tarda un tiki prome ku mi sistema a deshasí di e problema. Pa un ratu mi tabata keda sin sinti nada, pero despues mi kehonan tabata bolbe lanta kabes bèk. Danki Dios ku kada bes e tabata manifestá su mes den un forma menos sevéro. Despues di 3 a 4 seshón den kual mi kehonan tabata wòrdu tratá na un otro forma, mi no tin keho mas di ningún sorto. Porfin mi ta sintimi nòrmal atrobe. Loke mi a gusta ta ku Marlene ta bisa bo paso a paso loke ku e ta hasi. E ta splika kon e terapia ta traha i ta duna bo bon guia durante di e proseso. Ademas di esei mi tabata haña ku su bos ta sumamente ameno i tabata pas ku e forma di tratamentu aki. I esei tambe ta e motibu pa kual mi ta kere ku e método aki ta pas hopi bon pa judami ku mi problemanan.
Mi ta kontentu ku danki na bo ayudo, mi a logra deshasí di mi kehonan.
Si ta asina ku bo tin keho i meskos ku mi bo ta un asina jamá ‘hulandes nuchter’ ku ta pensa ku e kehonan lo pasa di nan mes òf bo ta lucha hopi tempu kaba ku sièrto kehonan, mi kier bisa bo: “Duna hipnoterapia e ora ei un chèns”. Finalmente e kos di mas importante ta pa bo deshasí di bo kehonan i sinti bo mihor.
Danki pa tur e ayudo Marlene.
Y (Hulanda)
Simplemente for di nada mi problemanan a surgi. Asta konsentrá tabata bai difisil.
Esta un estorbo! E tabata bira kada bes mas pio, ku mi no tabata sa mas kiko pa hasi.
Ma bin den kontakto ku Marlene i e a logra komprondé ta dikón mi ta tin molèster.
Ela huza diferente “téknika” i ora bo sali foi serka dje, bo ta kuminsá pensa.
Dikón bo ta reakshoná asina? Marlene ta logra saka foi bo ta kiko ta pasando ku bo.
Mi ta kontentu ku mi por a bin serka bo. Mi sa awor kiko mi tin ku hasi, en kaso ku mi bolbe sinti molèster.
Esaki ta duna pas i asina tambe bo tin menos strès.
E ta hopi partikular ku bo por juda un persona di e manera aki.
Danki un biaha mas Marlene.
Brigitte (Hulanda)
Ta dor di un programa di televishón ma bira kurioso kiko hipnoterapia por a signifiká pami i mi ta tin e sintimentu fuerte ku esaki tabata loke mi tabata buska!
Mi a bai terapia nòrmal hopi biaha i parsialmente ela judami tambe. Pero apesar ku na terapia nòrmal mi por a konta mi historia i desahogá mi mes, tòg mi tabata en buska di algu ku por a judami pa bèrdaderamente duna mi eksperensianan un lugá i sera sièrto kapítulonan. I ta pa e motibu aki, mi a disidí di bai hipnoterapia serka Marlene. Ela lagami sintimi hopi na kas. I despues di e intake, mi ta tin ahinda e sintimentu ku mi tin ku hasi e kos aki. Aunke ku mi tabata puntra mi mes ta kiko tur lo bai sosodé.
Mi a siña hopi tokante kon skucha bon na loke mi kurpa tin di bisami i ku no ta tur kos por wòrdu solushoná mes ora. Pero awor si mi sa ta kon mi mester atendé ku esaki. Mi a hasi bon uso di e refuerso di ego i e enkarnashón di esensia ku mi a haña riba mi MP3 na e momentonan ku kos no tabata kana asina bon ku mi. Mi tabata skucha nan ora ku emoshonalmente mi no tabata sintimi asina bon i ora ku mi tabata sintimi hopi insigur. Ela judami asina hopi, ku mi ta hasiendo poko uso di dje awor, pasombra mi ta sintimi mas mihor. Aworaki mi ta kombersá tambe na un manera trankil tokante kosnan ku no a sintami bon. Antes esaki no tabata bai asina bon.
Tambe mi a kuminsá pensa diferente tokante kosnan i mi ta purba pa otro personanan tambe por skucha mihor na nan kurpa i na nan pensamentunan. Pasó e ta juda di bèrdat i bo no mester tin miedu di hasi eskohonan.
Mi ta ripará tambe kada bes mas ku hendenan rondó di mi ta bisami ku nan ta mira totalmente un otro persona. Unu mas positivo. I mi mes ta ripará ku mi no tin miedu di hasi eskohonan òf pa sali pa mi sintimentunan òf pa pensa menos riba mi mes. Tambe mi ta ripará ku mi tin kada bes mas konfiansa propio i ku mi ta sinti ku mi tambe tin derecho di tei. Mi ta radia esaki tambe, ku na su turno tin su infuensia tambe riba mi relashón. Aworaki mi relashón ta mas mihor i mas trankil i mi ta disfrutá di bida. Tambe mi tin mas bista aworaki pa tur loke mi partner ta hasi pami i ta bisami. Mi no ta mira solamente e kosnan negativo mas!
Dor di hipnoterapia mi a bira mas fuerte i tambe muchu mas positivo. I e momento ku mi no ta sintimi asina bon, bolbe skucha mi MP3 ta juda. Na e momentonan ei mi ta pensa ku mi por i ku mi tin derecho di tei. Esaki ta loke hipnoterapia ta nifiká pami. I siguramente lo mi rekomendá otro personanan pa purbé, pasó bèrdaderamente e ta juda.
Margeet (Hulanda)
In Trance. Kiko ta In Trance? Mi a bira kurioso na kiko e ta, pasó e ultimo 5 añanan ma pasa den hopi kos. Mi a buska ayudo i años mi tabata serka trahadonan soshal. Pero nèt ora ku mi a kere ku mi a logra sobrepasá tur kos, e atákenan di pániko/miedu a bin.
Prome mi no tabata sa kiko tabata pasando ku mi. Ami ku no tabata haña miedu asina lihé di algu, tabata haña kada bes mas miedu.
E tabata sorprendé mi kada bes na e momentonan ku mi tabata pensa ku despues lo mi mester keda mi so. Den komienso mi tabata por ku ne, pero mas despues mi amigunan mester a bin serka mi. E situashón tabata bira kada bes mas pió.
I tabata na e momento ei ku mi a bin den kontakto ku Marlene, danki Dios!
Mi tabata hañé emoshonante, pasó nunka mi tabata tin algu ke haber anteriormente ku In Trance òf hipnósis. Wèl, e kosnan a kana perfekto i esta kontentu mi ta ku Marlene!.Tokante e baimentu den trance mi por bisa bo poko. Mi mester a djis bai drumi un kaminda i relahá. Esaki a bai basta bon, pasó kada bes mi tabata pega soño denter di 5 minuut. Ami no por kòrda nada mas, pero semper mi tabata hasi un chansa di e kos. Mi tabata bisa Marlene: “Bo a haña chèns di hasi bo kushina limpi?”. Pasó tabata despues di 45 minuut ku e tabata lantami i mi por a lanta mesora bèk riba mi dos pianan!! 5 seshón despues no tabata tin ningún rastro mas di miedu. Ela bai na un manera soprendentemente nòrmal i rápido. E ora ei nos a palabrá ku lo mi no tabata tin mester di bin mas. Aworaki nos ta práktikamente un aña mas despues i ta bayendo bon.
Marlene simplemente bisá a salbami, pasó mi no tabata por a biba un bida nòrmal mas. I despues di 5 seshón ma reenkontrá mi mes di nobo. Loke ku ta importante i agradabel ta, ku e no a purba pa saka sèn for di mi bisando mi pa mi bin un par di bes mas. Esaki ta duna bo mes ora un sintimentu sigur. Hopi bon ta ku 75% a wòrdu kubrí dor di mi seguro. Tambe e ta bon pa sa ku e ta forma parti di un beroepsvereniging NBVH. Bo tin e siguridat ora ei ku bo ta serka un profeshonal i no serka un persona ku no ta rekonosí!!!.
Mi por rekomendá tur ku tin problema di: miedu, komementu, humamentu, imáhen propio malu òf kualkier otro kos, pa bai serka Marlene. I en todo kaso sikiera purba serka dje!!!
Aworaki mi tin plan di bolbe traha un sita pa atendé ku mi humamentu. Mi ta hopi kurioso pa sa ta kon e kos lo kana, pero mi ta bai pe i nos lo wak kiko lo bai sosodé.
En todo kaso mi ta kontentu ku Marlene a bin riba mi kaminda. I mi ta hopi hopi satisfecho pa loke ta trata e tratamentu ku ela dunami.
Kerida Marlene, DANKI!!!!!
Yvonne (Hulanda)
Mi tabata tin pa un tempu largu keho di tenshón i hopi biaha mi tabata sintimi hopi infelís.
Mi no por a jamé depreshón, pero siguramente mi tabata enkontrá mi mes leu for di loke tabata wòrdu jamá felisidat di bida. Mi tabata drumi malu i hopi biaha mi tabata keda lantá tres òf kuater ora prome ku mi drumi. I tabata ku hopi esfuerso mi tabata logra pasa dor di mi dia.
Dor di e drumimentu malu, mi nivel di energia tabata klaro hopi abou. Esaki na su turno tabata tin efekto riba mi estado di ánimo i mi gana di hasi kos.
Mi no tabata gusta bebe remedi i e dòkter di kas i e sikólogo ku mi tabata bishitá, ja no por a sigi judami mas. Mi no ta tin alternativa mas.
Un persona a hasimi atento riba e praktijk di Marlene i ami a pensa: “lagami purbé numa”. Pasó e no ta mata bo si bo purba.
Despues di e intake, mi a sigi pa e prome seshón.
Jená ku tenshón mi a bai i a konfia mi mes den man di Marlene. Pasó na final di kuenta mi no tabata sa mas kon pa sigi. Bai bou di hipnósis mi no a eksperensiá nunka. Marlene a lagami sintimi na kas i durante di e seshón mi a hañami den un oasis di trankilidat.
Mi no por a kòrda mes mas ta foi ki dia mi a sintimi asina relahá. Dor ku mi a haña e grabashón di MP3 bai kas ku ne, mi tabata skuché e prome dianan tur anochi prome ku mi bai drumi. Masha lihé mi a logra pa drumi sigur 3 òf 4 ora den anochi sin lanta. Kaminda antes mi tabata keda lantá. Despues di e seshónan ku a sigi, mi tabata sintimi mentalmente mas fuerte. Mi tabata mas relahá, mi tabata drumi bon atrobe i mi tabata kapás na relativá kosnan atrobe. Mi sintimentu di alegria a subi enormemente i mi a bolbe haña mi siguridat propio bèk.
Loke ahinda mi tabata tin molèster di dje tabata miedu di halturanan. I no ta un tiki miedu mi tabata tin. Subi e trapinan pa bai na e praktijk di Marlene tabata den komienso kasi imposibel pami. Mesun relahá ku mi tabata na final di e seshón, e mesun tenso mi tabata atrobe ora mi jega abou. Mi ta tin ku lucha ku mi mes pa baha e 2 trapinan ku bo ta haña nòrmalmente den kada kas di famia.
Trapi i ròltrappen den sentronan di kompras ku espasionan habri rondó di nan tabata un krímen pami. Pa evitá trapi i ròltrappen, mi tabata sa kon pa den 5 minuut mi haña e asensór den kada tienda. Bo no tabata hañami nunka serka di balustradanan i balkónan. Mi seshón tabata djabièrnè anochi, djasabra lo mi a bai ku mi yu hòmber pa bai kumpra kos pa su kas nobo.
Pa mi gran sorpresa den ningún di e tiendanan e trapinan òf e ròltrappenan a forma un impedimentu pami. Sin ningún sorto di miedu mi a hasi uso di nan pa baha bai abou òf subi bai ariba.
Esta un alivio i un sentidio di libertat tambe e kos aki a dunami. E nesesidat di evitá halturanan i trapinan a para bira un manera di biba pami i esaki tambe ma logra na laga bai.
Mi por biba mi bida relahádamente atrobe. Klaro ku tin tenshónan den mi bida i no ta tur kos ta kana manera mi kier, pero awor mi a haña tur e instrumentonan (grabashónan di MP3) i e téknikanan di e mente konsiente pa tene mi tenshónan na un nivel saludabel. Dor di esaki mi tin mas energia i mi ta kuida mas mihor pa mi mes.
Cèlia (Hulanda)
Danki …..demasiado pa mi nombra…….bo ta envolví, bo ta tuma e kliente na serio, bo ta skucha i loke ta mas importante: bo ta juda bo kliente na haña vishón den su mes i den otronan……..sigi asina….danki Marlene.
Margeet (Hulanda)
Kumbai! Ta ami mes atrobe. Djabièrne ku a pasa mi tabata serka Marlene pa kuminsa purba stòp ku humamentu.
Mi no tabata motivá i en realidat mi tabata kier a kanselá e sita! (Aña pasá mi a stòp un par di luna despues di un inflamashón di pulmón, pero mi no por a mantené). Pasó mi tabata pensa: “kiko mi tin ku bai hasi einan, siendo ku mi no tin niun tiki gana di hasi e kos aki?!”. Danki Dios ma bai tòg! Marlene a bisami: “Ai, nos lo wak ta kiko por hasi na e problema”. Ela kuminsa traha ku mi i klaro mi a bolbe pega soño. Antó en kaso ku e kos no resultá, e sigarianan tabata buta tòg banda di mi den auto! Pero despues di e sita mi no a mishi ku nan mas. Nan ta na kas i mi amiganan por huma trankilamente padén den kas i ami no ta partisipá. Joepi!
Keremi ku mi ta super super sorprendí ku e kos ta kanando asina bon. Mi ta spera tambe ku lo mi keda mantené asinaki. Awor mi tin ku bai solamente 1× mas i despues mi tin ku tende mi MP3 pa 3 siman largu tur dia. Nos ta bai purba tur kos i ai mi ta spera ku e biaha aki si lo mi logra. Te ahinda e kosnan ta kanando super i pesei mi ta pensa: “Imaginá bo mes ora ku si bo ta motivá kiko tur lo bo por alkansá?”. Si esaki logra, ta hopi hende mas lo bin despues di mi pa stòp ku humamentu…..
Marlene te asina leu DANKI. Lo bo tende despues kon a sigi!!
Margo (Hulanda)
Ku e terapia aki di bèrdat mi ta tin e sintimentu ku ela judami.
Marlene a lagami sintimi hopi na kas i a dunami un bista kla kon mi ta, kon mi no kier ta mas i kiko mi no kier pa tuma lugar mas.
Tambe mi a kuminsá pensa diferente tokante kosnan. Mi ta skucha mi kurpa awor mihor i mi no tin miedu di hasi eskóhonan.
Mi por hiba mi bida atrobe na un manera relahá.
Te ahinda tin tenshónan den mi bida i no ta semper kosnan ta kana manera mi ke. Pero awor ku mi tin mi grabashónan di MP3i téknikanan di e mente konsiente mi tin un nivél di tenshón ku mi por biba ku ne.
Mi tin mas energia pa hasi kosnan i mi ta kuida mihor pa mi mes.
Siguramente mi no ta kla ahinda, pero mi ta riba e bon kaminda.
Marlene, danki pa e seshónan ku a dunami asina tantu.
A.J.H. (Hulanda)
For di e temporada di otoño di aña 2016 mi ta wòrdu tratá ku hipnoterapia i mi eksperensia ta hopi positivo. Den kuminsamentu mi tabata puntra mi mes si e kos aki lo bai funkshoná pami. Pero si! E hipnoterapia a judami di bèrdat hopi, pa mi por a prosesá e kosnan fèrfelu di mi pasado. Esaki despues di a pasa dor di diferente tratamentu via di Riag, yoga, terapia di resonansia, kursonan di meditashón i píldora di mi dòkter di kas pa trankilisá mi. Nunka ma pensa ku lo mi por papia manera awor tokante mi eksperensianan, sin sinti ku ta manera un peso pisá ta bin kai riba mi. Despues di hopi aña esaki ta henter un revelashón pami. Esaki ta mi eksperensia ku mi ta hopi kontentu ku ne. Un pashènt satisfecho.
Mitchell (Hulanda)
Loke In Trance ta nifiká pami di bèrdat ta ireal. Komo mucha hòmber jòn di 17 aña, mi a kuminsa hañami ta eksperensiá atákenan pisá di pániko i tambe malesanan ku di bèrdat a kuminsa ta kontrolá mi bida. E atákenan aki mi tabata haña nan, kaminda mi tabata rondoná di multitut di hende manera konvoi òf metro. E atákenan aki a kuminsá ta dominá mi asina leu, te ku mi no por a bai New York. Algu ku asta e dia di awe, mi ta wak bèk riba dje ku hopi tristesa.
Esaki tambe ta e momentu ku mi a kuminsá buska ayudo profeshonal, pasó mi no por a sigi mas asinaki. Di baina mi tabata sali, mi tabata skonde den mi mes i mi no tabata probechá di retonan ku bin den mi kaminda. Esaki tabata e momento ku mi a bin para na In-Trance. Un organisashón ku ta ofresé ayudo den hipnósis i relahashón.
Den kuminsamentu e tabata difísil pa enfrentá e miedunan ku mi tabata tin i buska pa konfrontá nan. Pero ku e guia fantástiko ku In Trance ta ofresé bo, bo ta purba na deskubrí for di unda e kosnan aki ta bin i kon bo por logra kambia nan. E lèsnan tabata asina relahante i amplio, ku bo ta keda asombrá di kiko tur nan por hasi ku bo. Asina relahante i asina trankilisante.
Despues di mi tratamentu mi por bisa awor, ku mi por kana atrobe riba kaya sin ningún problema. Tambe mi no ta tin ningún keho di e atákenan di pasado. Mi por sintimi liber atrobe sin ningún klase di preokupashón i mi por bai unda ku ta sin ningún problema.